1 Peter 2

Krais koor umua poka-ke, ne i yia kekanoweya eliwa ikemik

1Naapeya ni sira samora ne wadol opora piipueka. Mua oko me wia wadolaloweka, maa kema me wiar kueka, ne opor samora aakunemi me wia firekeka, sira unowa nain piipueka. 2Muuk gia eena meseka-pariw ikaiya naap, nis pun naap, Mua Maneka opor makena-pariw ikeka. Naeya gia saarik opora nain feekiya arimep ikok eliw akena ikowen. 3Moram ni Mua Maneka sira wiar furewap paayarep maiman, yiena Maneka-na eliw akena-ke, naap maiman.

4Yiena Maneka-na anane ikaiya. Feenap saarik, poka nain wi koora kuow mua-ke miatinep iiraremik. Nain Mua Maneka-ke iiriw maa eliw akena-ke naep pepekimep-puak. Naapeya ni poka nain wameiya ekeka. 5Ekami nis pun poka anane naap ikaiya nain saarik ikowen. Mua Maneka ni wapen poka saarik nia aawep koora kuisow nain kuam-ikaiya. Naeya ni wi pris Mua Maneka maa patirowa saarik Yeesus Krais unuma-pa uuwowa ele-eliwa onomowen, uuwowa eena niar kookaliya nain. 6Eena Mua Maneka opora maek feenap,

“Poka oko yos-ke Saiyon ema-pa iimarowap-puam. Nain eliw oram, yena nanikap koor gone umua poka wuam. Ne mua eena poka nain makena-ke naimik nain me oboserikuan, maa makena urufikuan,”
(Aisaiya 26.16)

naap maek. 7Aria ni opora opiman nain poka nain manek akena kema wiisareman. Ne wi opora me opimik nain Mua Maneka opora maek nain makena arinon, feenap,

“Wi koora kuow mua-ke poka nain miatinep iiraremik, nain aakisa koor umua poka arek.”
(Someka 118.22)

8Ne pun maek,

“Wi mua poka fain anian irap wakikuan, ne nain muuta nain oro-boonikuan,”
(Aisaiya 8.14)

naap maek. Moram wi opora miimimik nain me opimik, naapeya oro-boonimik, Mua Maneka iiriw wia maek naap.

9Aria ni ona nia nanikap nia aawok nain-ke. Ni Mua Maneka pris teeria wiar ikeman, eena miiwa fain urufam-ikaiya nain. Ni dubila ikeman, ona teeria kakeniw-ke. Eena ni iiriw kokom tenowa-pa ikaiwkin ona nia aawep ona parin eliwa akena-pa nia wuak nain. Ona opor eliwa ariman maomeka naep nia aawok. 10Ni iiriw o teeria-pa me wiar ikeman, nain aakisa ona teeria wiar areman. Ne nia kemalem-ikua nain iiriw sisina-pa ikeman, nain aakisa nia kemaliya nain tepak-pa wiar ikeman.

I Mua Maneka taar teekow mua wiar ikaiyen

11Emar unowik, i owow onoma me miiwa-pa fan ikua. Naapeya ni feenap oneka akena nia naiyem. Ni nain naep niena mia kookalowa ookowa sira nain piipueka. Sira samora nain-ke baliwep ikowa nain kema nia irakowiya. 12Ni wi Mua Maneka me ookimik nain bilik ikeman, nain ni sira eliwa-pa ikeka. Makena wi wadolalemi pina mia-pa nia wuimik, nain ni sira eliwa niar urufap Mua Maneka ekapow fofa-pa o unum maneka fakerikuan.

13Ni Mua Maneka kema suuwap wi woos mua owowa nia urufam-ikaimik nain tepak-pa wiar ikeka, wi anim onoma, ne wiena uuwow mua, wi naap iiwawun maneka opora wiar miimeka. Moram wi anim onoma wia sesekiwkin wi sira puukimik nain wia kakenami yoowa wiimik, ne wi eliwa ikaimik nain wi mua eliwa-ke wia naimik. 15Moram Mua Maneka fain kookaliya, ni sira eliwa onam-ikaiwkin wi mua kema marewa opor samo-samora aakunimik nain-ke sira niar urufap opora marew, oram rurukerap ikaikuan. 16Makena, ni mua oko tepak-pa me wiar ikeman. Nain feenap me maeka, yiena kookalowa-pa ikemik, naep sira samo-samora eliw oniyen, ni naap me maeka. I Mua Maneka taar teekow mua wiar ikemik, naap maep sira wiar ookow muutiw ikeka. 17Wi mua unowa oram eliwa kuisow wia naeka. Ne niena teeria epaskun wi Yeesus teeria-pa ikemik nain wia kookaleka. Naemi Mua Maneka keker opaka ne wi anim onoma opora wiar miimeka.

Krais ookami sirirowa eliw aawiyen

18Ne ni uuwow mua sesa marew wia uuwomiman nain, niena saria tepak-pa wiar ikok ekima maneka wia opap opora wia miimeka. Wi saria eena eliwa nia wuimik nain, ne wi saria samora nia wuimik nain pun opora wia miimeka. 19Feenap, mua oko sira samora onowa marew, nain o Mua Maneka kema suuwap sirirowa eliw aawinen naemi aawinon-na eliwa. Mua Maneka sira nain wiar kookalep mua eliwa naakinon. 20Nain ni maa-ko samoriwkin yoowa niikuan-na mua eliwa nia nainon-i? Weetak. Ne ni sira eliwa oniwkin oram maneka yoowa niikuan-na mua eliwa nia nainon. 21Fain naep nia farep nia aawok. Moram Krais ni pina muuta nain sirirowa aawok, ne yo sira yookeka naep nis pun sirirowa aaweka naek. 22Mua Maneka opor ara oko o maemi maek,

“O sira samora-ko me onak ne wadol opora-ko me oneya wiar miimamik.”
(Aisaiya 53.9)

23O firekiwkin kerewarep me wia kiripomak. O samor akena onamik, nain kiripowa-ko me maek, weetak. Feenap maek, Mua Maneka baliwep akena yia mekawiya nain ona maa-ke. 24Os-ke i pina onowa piipuap kakeniw ikok sira makena-pa ikeka yia naemi i pina ona mia-pa yiar akuawep nomokow moke-pa umok. Sirirowa aawok nain-pa nia saliwak. 25Ni iiriw sipsip saarik era makena ookowa kookopam-ikeman, nain aakisa ni kirep sipsip urufow mua wiar ekapep ikeman, eena ni kukusa niar kakenami nia urufam-ikaiya nain.